കീബോർഡ് വിപ്ലവം മുഖപുസ്തകത്തിലൂടെ...

29 മേയ് 2011

ഭാഷാ ന്യൂനപക്ഷങ്ങളെ തീവ്രവാദികളാക്കരുത്

കാസർക്കോട്ട് ഒരു ദിവസമെങ്കിലും ജീവിച്ചവർക്ക് അവഗണിക്കുവാൻ വേണ്ടി മാത്രം ഉണ്ടാക്കിയ ജില്ലയാണ് ഇത് എന്നതിൽ കവിഞ്ഞ് മറ്റൊന്നും പറയാനുണ്ടാവില്ല. സർവ്വ സർക്കാർതലങ്ങളിലും കടുത്ത അവഗണന നേരിടുന്ന ഈ ഭൂപ്രദേശത്തെ കർണ്ണാടകത്തിൽ ലയിപ്പിക്കണമെന്ന വാദം ഉയരുമ്പോഴെല്ലാം ഇവിടുത്തുകാരെ അക്കരപ്പച്ച മോഹിപ്പിക്കാറുണ്ട്.

ഈ അവഗണനയുടേയും അവഹേളനത്തിന്റേയും ഏറ്റവും അവസാനത്തെ പതിപ്പാണ്, ഇക്കഴിഞ്ഞ മാർച്ചിൽ പ്ലസ് റ്റൂ (+2) പരീക്ഷയെഴുതിയ കാസർക്കോട്ടെ ഭാഷാ  ന്യൂനപക്ഷ വിഭാഗമായ കന്നട വിദ്യാർത്ഥികളുടെ ഫലം പ്രസിദ്ധീകരിക്കാതെ മാനസികമായി പീഡിപ്പിക്കുന്ന സർക്കാർ നടപടി. 

കണ്ണൂർ സർവ്വകലാശാലയുടെയും കർണ്ണാടക സർവ്വകലാശാലകളുടേയും ബിരുദ കോഴ്സുകൾക്ക് അപേക്ഷിക്കേണ്ട അവസാന ദിനം ഇന്നലെ കഴിഞ്ഞു. ഇവിടുത്തെ തന്നെ പ്ലസ് റ്റൂ 'സേ' പരീക്ഷയ്ക്ക് അപേക്ഷിക്കാനുള്ള അവസാന ദിനം ഇന്ന് (30.05.11) ആണ്. എന്നിട്ടും ഇന്നേവരെ പരീക്ഷാഫലം പ്രസിദ്ധീകരിക്കാൻ സർക്കാറിന്നായിട്ടില്ല.

കാസർക്കോട്ടെ കന്നട മാധ്യമത്തിൽ പരീക്ഷയെഴുതിയ വിദ്യാർത്ഥികളുടെ ഉത്തരക്കടലാസുകൾ ആദ്യം കേന്ദ്രീകൃത മൂല്യനിർണ്ണയകേന്ദ്രത്തിലേക്ക് അയക്കുകയും അവിടെ കന്നട വായിക്കാനറിയുന്നവർ ഇല്ലാത്തതിനാൽ  കാസർക്കോട്ടേക്ക് തിരിച്ചു അയക്കുകയായിരുന്നു. തുടർന്ന് ഇവിടെ നിന്ന് മൂല്യ നിർണ്ണയം നടത്തി മാർക്കു വിവരങ്ങൾ ഹയർസെക്കന്ററി ഡയറക്റ്ററേറ്റിലേക്ക് അയച്ചിട്ട് മൂന്നാഴ്ചയായെന്ന് കാസർക്കോട് വിദ്യാഭ്യാസ വകുപ്പ് ജീവനക്കാർ പറയുന്നു.

ഭരണം ഏറ്റെടുക്കുന്നതിന്റെ തലച്ചൂടുകളിൽ പുകയുന്ന സംസ്ഥാന ഭരണ നേതൃത്വത്തിന്റെ കഴിവുകേടുകളും അതു മുതലെടുക്കുന്ന ജീവനക്കാരുടെ ഉത്തരവാദിത്വമില്ലായ്മയും മൂലം മാനസിക പീഡനം അനുഭവിക്കുകയും, ഉന്നത വിദ്യാഭ്യാസ അവകാശങ്ങൾക്ക് തടസ്സം നേരിടുകയും ചെയ്യുന്ന ഈ വിദ്യാർത്ഥികൾക്കുണ്ടാവുന്ന കഷ്ടനഷ്ടങ്ങൾക്കാര് ഉത്തരവാദിത്വം ഏൽക്കും?

ഇവിടുത്തെ ഭാഷാന്യൂനപക്ഷങ്ങളെ ഈ രീതികളിൽ അവഗണിച്ച് അവരേയും പ്രാദേശിക-ഭാഷാ തീവ്രവാദികളാക്കി മാറ്റാതിരിക്കാൻ നാമോരുത്തരും ജാഗ്രത പാലിക്കേണ്ടതുണ്ട്.




4 അഭിപ്രായങ്ങൾ:

വാല്യക്കാരന്‍. പറഞ്ഞു...

നന്നായി മച്ചൂ...

Jefu Jailaf പറഞ്ഞു...

ഈ ഒരു അറിവ് പങ്കു വെച്ചതിനു നന്ദി ..

Sreejith kondottY/ ശ്രീജിത് കൊണ്ടോട്ടി പറഞ്ഞു...

പിന്തുണക്കുന്നു...

ഡോ.ആര്‍ .കെ.തിരൂര്‍ II Dr.R.K.Tirur പറഞ്ഞു...

പ്രതിഷേധിക്കുന്നു...